Hvað hægt er að gera

Hér eru nokkur dæmi um það sem hægt er að gera meðan þú dvelur í Djúpavík:

Gönguferð - Djúpavíkurhringur

Stutt gönguleið (u.þ.b. 5 km) sem hefst í Djúpavík. Gengið er eftir stikaðri leið upp á klettahjallann fyrir ofan þorpið, þar sem fossinn fellur fram af brúninni. Stórkostlegt útsýni yfir fjörðinn er ferðarinnar virði. Tekur u.þ.b. 3 klst. (eða lengur ef oft er stoppað).

Gönguferð - Naustvík

Gömul gönguleið yfir Naustvíkurskörð frá Naustvík til Trékyllisvíkur. Þessi leið var fyrrum notuð af heimafólki til að fara í kaupstað í Kúvikum. Leiðin er u.þ.b. 3,5 km og
tekur 1 til 2 klst. aðra leiðina.
Margar fleiri gönguleiðir eru í nágrenninu – Kúvikur, Kambur og Reykjarnes til dæmis. Biðjið um nánari upplýsingar á hótelinu áður en lagt er af stað.

Gjögur

Röltið um á milli litlu vinalegu húsanna þar sem áður var helsta hákarlaverstöð á landinu. Þar er engin föst búseta lengur, en húsin eru notuð af fyrrum íbúum til sumardvalar. Á Gjögri er flugvöllur sem flogið er á tvisvar í viku frá Reykjavík.
Á Gjögurströnd er stórbrotið landslag sem er frábært
að ganga um.

Krossnes - sundlaug

Þegar ekið er eftir veginum norður fyrir Norðurfjörð er komið að sundlauginni í landi Krossness. Sundlaug þessi er einstök, bæði hvað varðar heita vatnið sem kemur úr hverum ofan í hlíðinni og hvað varðar staðsetningu. Hún er staðsett niðri í fjöru og útsýnið getur verið stórkostlegt þegar sólin er að setjast um miðnættið og oft má sjá seli að leik rétt fyrir utan.

Kört - Minja- og handverkshús

Við bæinn Árnes í Trékyllisvík er frábært lítið minja- og handverkshús. Þar eru til sýnis gamlir munir allt frá miðöldum til okkar tíma. Þar eru einnig til sýnis og sölu handverk og listmunir unnir af fólki úr héraðinu.

Norðurfjörður – verslun/bensínstöð/sparisjóður

Á Norðurfirði er stunduð smábátaútgerð, þar er rekin ferðaþjónusta og þaðan eru reglubundnar bátsferðir á Hornstrandir. Þar er útibú Kaupfélags Strandamanna sem selur allar helstu matvörur og eldsneyti og á Norðurfirði er einnig útibú frá Sparisjóði Strandamanna.

Gönguferðir um Hornstrandir

Á Hornströndum eru langar strandlengjur sem orðið hafa æ vinsælli til gönguferða með hverju árinu. Þar er náttúran óspjölluð og engir bílar til að skemma fyrir. Þangað er aðeins hægt að komast gangandi eða með bát frá Norðurfirði yfir sumarmánuðina.

Upplýsingar fást á vefnum: www.freydis.is
Við mælum með: Dagsferð með bátnum frá Norðurfirði til Hornbjargsvita.